زوجي عبء ثقيل ..أشعر أنني غير متزوجة
السلام عليكم ورحمة الله وبركاته أنا كتير بقرا موضوعات فى المنتدى ده ويعجبنى ردك جدا يا أستاذه وعشان كده تشجعت أنى أكلمك عن مشكلتي المعقدة من وجهة نظرى لعلى اجد عندك حل ليا انا تخرجت من كليه من كليات القمه وتخرجت عملت دراسات أثناء دراستي كنت يشتغل يعنى عشان مش اتقل على اهلى احنا كلنا بنات والدي ووالدتي بيعاملونا احسن معامله فى الدنيا بامانه وبيخافوا علينا جدا علاقتنا بقرايبنا خصوصا اعمامنا منقطعه لانهم عملو لنا مشاكل كتير لانهم بيحقدوا علينا عشان الحمد لله مستوانا عالى وكمان ربنا مبارك فينا وناجحين فى دراستنا بعكس ولادهم قاطعناهم احنا ناس فى حالنا ومعروف عننا كده بس اعمامى كتار وبيتجمعوا دايما ايد واحده ضدنا لانهم بيستضعفونا على اساس اننا بنات مش ده الموضوع اللى هشتكى منه بس له تاثير كبير فى حياتى انا دايما كنت بحاول اعمل اى حاجه يعملها الولد فى مساعدة والدى عشان مش احسسه باى نقص من انه معندوش ابن ودايما بعتمد على نفسى فى فترة الماجستير .
اتعرفت على زميل ليا حبيته جدا بجد واعتبرته اخ وصديق وحبيب واتمنيت يكون زوج مشكلته انه من بلد تانيه عادى مش مشكله اوى بس اللى عرفته ان والده كان بيشتغل حلاق وسافر اهلى اما عرفوا رفضوا وعملولى مشكله وقالولى ابعد عنه بس مش قدرت وقولتلهم مش غلط ان يكون شغلته كده طالما شريفه وحاولت افهمهم انه اكيد هيرجع من السفر معاه فلوس ومش هيشتغل تانى كده وطبعا ده حسب كلام الانسان اللى بحبه فترة ماقبل الخطوبه والخطوبه كنت بساعد حبيبى بفلوس وبتشجيع منى مكنتش بشوف فيها عيب انى اديله فلوس بما انه بيصرف على اخواته هو وحيد فى وسط بنات لان ابوه مكنش تقريبا بيعبرهم ولفت الايام وقدرت اقنع اهلى اننا نتخطب وفعلا جاب والدته وعمه وجهم هما ناس مستواهم قليل اوى وبيتكلموا على الفطره .
بس انا طبيعتى بحب الناس وبحترم طبيعتهم تنازلت عن شبكه ومواسم وهدايا عشان يخلص شقته اتكلمنا اننا ناجر شقه فى مكان كويس لانى مش هقدر اعيش فى قريه بس هو قالى خلينا الاول نتجوز فى الشقه فى بيت اهلى فوقهم يعنى عشان انا وحيد على الاقل يفرحوا بيا وبعدين اوعدك نعيش فى مكان كويس وافقت وفعلا جهز الشقه وابوه نزل ابوه بيتكلم بطريقه انه مليونير ومع ذلك اما شوفت الحال لقيته رجع فتح محل الحلاقه والشقه مش بتخلص لان ابوه راجع مفلس وحبيبى بيشتغل وبيصرف على الشقه وانا بساعده ساعدته كتير بجد وسهلتله حجات كتير عشان خاطر نتجوز بسرعه طالت فترة خطوبتنا والناس بدات تتكلم وبقينا نحدد معاد ويتلغى لانه مخلصش واخيرا خلص الشقه والعزال واما روحنا نشوفها كانت صدمه لانها بجد وحشه ومع ذلك تغاضيت ووالده حاول يعمل مشاكل عشان يفشكل الجواز وبرده تغاضيت عشان بحبه مع ان اهلى كانوا بيحذرونى لاخر لحظه بس انا كان كل همى اكون معاه واخلى بقى الطريق لبقيت اخواتى يتجوزوا عشان الناس وشماتة اعمامنا واما اتجوزنا للاسف نقطتى اخدها فقولت عادى احنا يدوب متجوزين واهو لسه مش مرتب نفسه
بقيت اشتغل واسدد ديونه ومش بيصرف عليا لا اكل ولا شرب مع انه بيقبض كويس تخيلى فى عز ان مرتبى بيخلص على ديونه البيت بيكون فاضى افضل استلف من دى ودا او اهلى يجبولى واما اتخنق واكلمه يزعقلى ولو ادانى فلوس بتكون زهيده ومش بتعمل حاجه ويفضل عليها كتير ميدنيش حاجه ابوه بياخد منه فلوس يجهز اخته وكمان يصرف على اهله اكل وشرب وبيعاملونى انى واجبى انى اسدد ديونهم واصرف على نفسى مش حاسه انى متجوزه مع ان اخواته المتجوزين مش بيشتغلوا ومتستتين فى بيوتهم بيتعاملوا معايه بضمرين وكل ده مش حاجه جنب انهم بيئه جدا جدا وكل اما اتخيل ان ولادى هيعيشه فى البيئه دى اموت الف مره كلمته كتير قولتله ناجر شقه حتى على حسابى نربى ولادنا بنضافه يقولى لا وكمان على موضوع الصرف عليا فهمته انى اخلاق منى وكرم ان اسدد ديونه مش فرض وانه زى مابيصرف على اهله لازم يصرف عليا مفيش فايده اهله كل مدى بينهبوا منه فلوس ويكرهوه فيا تعبت وسبت البيت والان انا على وشك الولاده ومعرفش اعمل ايه بجد حاسه انى مش متجوزه راجل وان تضحيتي وحيى ضاعوا هدر من غير تقدير منه ولا حب اعمل ايه بس انا عارفه انى طولت عليكى بس ارجوكى ساعدينى هل حلى الطلاق وعاوزه أقولك انه أوقات بيكون كويس اوى اوى وأوقات بيلعبوا فى دماغه من ناحيتي أرجوك ساعدينى .
أميرة - مصر
اسمحي لي لا أعلم كيف تكوني خريجة لإحدى كليات القمة ثم تكون كتابتك باللغة العامية الركيكة الممتلئة بأخطاء لم أجد وقتاً لتصحيحها ؟
ثانياً أنت تشكين من مشكلة أنت وحدك من صنعها ، فأنت اخترت هذا الرجل رغم كل عيوبه الواضحة أمامك وضوح الشمس ولم تسمعي لنصائح الأهل ورغم ذلك فأنت الآن تحتاجين إليهم لسداد ديونك التي تتراكم دوماً ، أنت لم تستفيدي من هذا الزواج بل هو من استفاد زوجة مطيعة هينة لينة تساعده وتسد عنه ديونه أولاً بأول ويتفرغ هو للإنفاق علي أهله او علي نفسه لا يهم ، وأنت علي حد قولك الطرف الخاسر دائماً فلماذا تتحملين كل هذه الأعباء هل لأنك اخترت ، هل لازلت تحبينه ولا تقوين علي فراقه ، هل تشفقين عليه لعلمك بعجزه وقلة حيلته وعدم وجود إمكانية للإنفاق عليه ، بالتأكيد هناك سبب ما يجعلك تتحملين كل هذا الخذلان وتلك المرارات ، ابحثي عن السبب الذي يجعلك تتحملينه والمزايا التي تجعلك تتغاضي عن كل هذه العيوب ، ثم حاولي تدعيمها وتنميتها ، وطالما أنك اخترته بملء إرادتك ولم يفرض عليك أحد أي شيء
فعليك السعي بكل جهدك وطاقتك للوصول إلي الرضا في علاقتك مع زوجك ، وجهيه لتصيح أخطائه ولكن بشكل غير مباشر ، ساعديه في البحث عن عمل إضافي أو وظيفة أفضل تساعده علي زيادة الدخل وتحسين مستواه المعيشي ، الفتي نظره إلي الاقتصاد في الإنفاق علي أهله لأن له بيتاً يحتاج إلي نفقاته ، حاولي أن تشعريه بالمسئولية نحوك ونحو بيته ولكن دون عصبية أو خناق أو ضجة وصوت عال ، المهم أن تحاولي تغيير وجه الحياة لديك بأي شكل لأن الاستسلام يبعني انهيار وإحباط إن ان زوجك هو قدرك ونصيبك وهو من اخترته بكامل إرادتك فاحملي قدرك فوق كتفيك وارضي بما كتبه الله لك وعليك واصبري وتحملي ولا داعي للشكوى ، لأنك خيرت واخترت ، فلم يبقي إلا ان ترضي وتواجهي واقعك بشجاعة وإما أن تغيريه أو تتكيفي معه .
فهذه هي الحياة كما نعرفها لحن لم يكتمل وقصيدة لم تنتهي وأغنية ناقصة ، ولم نحصل من الحياة علي كل شيء وحين نحصل منها علي كل شيء نكون قد فقدنا الكثير ، فبعد الكمال يبدأ النقصان وليس بعد تمام النعم إلا نقصانها ، فلا تبحثي عن المفقود في حياتك بل عززي الموجود واقنعي به واجتهدي في تحسين مستوي حياتك بالشكل الذي يروق لك ، ولا تزيدي أعبائك بالشكوى والضيق والضجر لأنك لن تزيدي حياتك إلا قتامة ، لا تيأسي من التغيير وتذرعي بالأمل وأضيفي إلي حياتك القليل من ألوان البهجة ، والله يوفقك ويعينك علي قدرك .
عواطف عبد الحميد
نتلقي رسائلكم علي الرابط التالي
تابعوا أوتار القلوب علي الفيس بوك
تاريخ التحديث :-
توقيت جرينتش : الأربعاء , 26 - 9 - 2012 الساعة : 11:7 صباحاً
توقيت مكة المكرمة : الأربعاء , 26 - 9 - 2012 الساعة : 2:7 مساءً [b]
الرئيسية 
التسجيل 
دخول 
السبت 13 أبريل 2019, 12:01 pm من طرف الكاتب والمفكر محمد موسي
