السلام عليكم ورحمة الله وبركاته
اللهم صل على سيدنا محمد وعلى اله وصحبه وسلم
(عَنْ نَافِعٍ ، عَنِ ابْنِ عُمَرَ ، عَنِ النَّبِيِّ صَلَّى اللَّهُ عَلَيْهِ وَسَلَّمَ ، قَالَ : " الذَّنْبُ لا يُنْسَى ، وَالْبِرُّ لا يَبْلَى ، وَالدَّيَّانُ لا يَمُوتُ ، فَكُنْ كَمَا شِئْتَ ، فَكَمَا تَدِينُ تُدَانُ " ).
ماما كنت بتكلم معايا فكرتنى بحكايه حصلت زمان
انا سمعتها وانا صغيرة بس كنت نسياها
في قريتنا زمان كان في راجل مصاب في عقله وطبعا كانت الناس بتعطف عليه بأى شئ
كانت مرات اخو جدتى الله يرحمها ست محترمه اوى وطيبه
وكانت بتعطف على الراجل ده
في مرة قدمتله اكل وقعد ياكله ورا الباب من الداخل وباب بيتها كان بيبين اللى وراه
راحت سلفتها قفلت الباب من برة عليهم كان بيتقفل بخشبه بتتحط زى ترباس
اكيد لو حد منكم فاكر بيوت زمان هيعرفها
وفضلت تصرخ ولمت الناس وقالت عليهم كلام مش كويس
الست الطيبه دى جالها مرض نفسي وبقيت اول ما يخرج جوزها من البيت تخرج وتمشى
في البلاد وجوزها يفضل يدور عليها
على فكرة الناس وجوزها ما صدقوش خالص لانهم عارفين ان الراجل ده مش في وعيه وعارفين انها محترمه
وكمان عارفين سلفتها وانها مفتريه
الست المظلومه دى كان ليها اخ دكتور في الجامعه وزوجته مذيعه في التليفزيون
المهم اخوها الدكتور لف عليها البلاد كلها لحد ما لاقاها
جابها كان شعرها فظيع جدا وبقالها كتيربدون حموم اخدها وطلع بيها الفيلا بتاعته قدام الجيران والبواب
كان عايش في فيلا متقسمه 3 ادوار
اخوها ده لا اتكسف منها ولا هرب
مراته الله يكرمها قصت شعرها ونضفته ولبستها احسن لبس عندها
وحاولوا يعالجوها لكن ما نجحش علاجها
جوزها لما راح ياخدها من عند اخوها اخوها رفض قال انه ممكن يهتم بيها بشكل افضل
كانوا قرايبنا يروحلها يلاقوها لابسه احسن لبس وبتاكل احسن اكل
طبعا جوزها كان هيموت عليها الست دى كان عندها ولدين
لينا حكايه معاهم فيما بعد
الست دى ما قعدتش كتير وماتت من قهرتها على سمعتها
على فكرة هى ماتت واولادها صغيرين جدا وزوجها رفض يتجوز بعدها لحد ما مات
لكن ربنا عمره ما بيسيب حد وكما تدين تدان
سلفتها اللى افترت عليها طلعت في يوم على السطح لقت بطه مش موجوده
فراحت تبص عليها وقعت
وقعت ورقبتها اتنت تحتها وماتت على الرغم
ان بيتها كان دور واحد طبعا عارفين بيوت الطين بتاعت زمان كانت منخفضه
وياما ناس وقعت واتكسرت بس لكن ده كان عقاب ربنا في الدنيا
وربنا العالم بعقاب الاخرة
يا ريت تكونوا طلعتوا بأى شئ من الحكايه دى يا ريت اللى مظلومه ما تزعلش لان ربنا هيجبلها حقها
واللى بتتكلم على حد يا ريت تخاف عقاب ربنا في الدنيا والاخرة
ويا ريت اللى عنده حد من اهله مريض او فقير بلاش يتهرب منه ويخاف يقول انه من اهله
حقيقي الواحد بيكبر لما يكبر اهله[b]