الدهب يفضل دهب مهما شال من عفاره

الدهب يفضل دهب
مهما شال من عفاره
والزفر يفضل زفر
مهما ينضف م الزفاره
والزباله بتبقى مسك
لو زباله من عِطّاره
==
ومصرنا معدتش يوم مستحمله
والحدود متخلله
متبهدله
والفتن جوه البلد متشعلله
والجوع يزيد
والحاله زايده ف الغِله
والفتاوى بأسم دين
متحلله
كل واحد بقه له ترزى
والفتاوى متفصله
ولاحد فيهم عاوز مصلحه
ولاقلبهم على امهم
حاطينها تحت المقصله
يا جماعه ما للسياسه والصلاه
مابقيتش فاهم ايه الحلال
ايه الحرام
وكلها جنب اختها ومحصّله
الصوم والصلاه
لازم لهم ركن الطهاره
والسياسه
مش طهاره
الدهب يفضل دهب
مهما شال من عفاره
والزفر يفضل زفر
مهما ينضف م الزفاره
والزباله بتبقى مسك
لو زباله من عِطّاره
اى رئيس
كلنا هندعى ربنا يعينه
لكن محدش يفرض عليه
انتخب واحد بعينه
أنا مصرى حر
والدنيا كلها عارفينه
مبنتميش غير للبلد
أنا صانع تاريخ
يشهد علىِّ الهرم
اللى احنا بانيينه
عارف حلالى وحرامى
مصرى وعارف دينه
ازاى تقول دخان حرام
وانته ماسك لى ف سيجاره
الدهب يفضل دهب
مهما شال من عفاره
والزفر يفضل زفر
مهما ينضف م الزفاره
والزباله بتبقى مسك
لو زباله من عِطّاره
يارب وفق كل صالح
اللى غرضه مش مصالح
اللى يقرِّب مننا
وبحكمته دايما يصالح
مش مبارك
ولا بشّار ولا صالح
رئيس حسيس
ومش كالِح
رئيس زكى
نبيه فالِح
يزرع صحاريها
ورد وموالِح
ويرجع وشها
لحالة النضاره
الدهب يفضل دهب
مهما شال من عفاره
والزفر يفضل زفر
مهما ينضف م الزفاره
والزباله بتبقى مسك
لو زباله من عِطّاره

عايزين رئيس
يتق ربنا فينه
يقدر بصدقه
وحكمته يمشِّى السفينه
يقدر بعزمه وقوته
ينشر لنا فيها السكينه
لحد ما تسير الحياه
ونلاقى مينه
ولو ف يوم يضحك علينه
احنا مش سايبينه
هنطلعوا عينه
عمرنا ماهنبقى خدِّامينه
ولانعذره ولا مسامحينه
يضحك علينا
هنكونوا ما حيينه
هنخزقوا عينُه
ونكون عدوينه
لكن يعيننا
كلنا نعينه
ونكون محبينه
لما راح تييجى البشاره

الدهب يفضل دهب
مهما شال من عفاره
والزفر يفضل زفر
مهما ينضف م الزفاره
والزباله بتبقى مسك
لو زباله من عِطّاره

لا عندنا شركات
لا ارض لا تركات
ملناش غير ربنا
يحمينا بالبركات
بنحافظ على الصلوات
عرضنا صوتنا
مانبعش فى الاصوات
ولاعندنا مصالح
ولا عندنا هفوات
راح نطمعوا ف ايه
ما كلنا اموات
وكلنا من مصر
اخوه مع اخوات
لابيننا كان حزب
ولاوعود كذب
وبنحسب الخطوات
مش عايزينها ف يوم بصاره
الدهب يفضل دهب
مهما شال من عفاره
والزفر يفضل زفر
مهما ينضف م الزفاره
والزباله بتبقى مسك
لو زباله من عِطّاره
هنقول اللى ف ضميرنا
ونراعى ربنا ف صوتنا
نختار رئيس يجيرنا
ويوفر لينا قُوتنا
ويربى يوم صغيرنا
لو جه ف يوم ومُتنا
ميكونش لحد غيرنا
يجمعنا ف يوم شتاتنا
يعوض ع اللى فات
لو مره القطر فاتنا
ونكونوا مستورين
ويحسن يوم حياتنا
لازم نختار بحِرص
دا معدش فيها وِرث
خلصت يا ميت خساره
الدهب يفضل دهب
مهما شال من عفاره
والزفر يفضل زفر
مهما ينضف م الزفاره
والزباله بتبقى مسك
لو زباله من عِطّاره

عايزين رئيس
يكون انسان
ماهوش تعلب
طالع له اسنان
ماهوش كاذب ولا خوِّان
ولانهّاب ولا فتّان
ولامحوش له كام فدّان
ولا بايع شبر ليهود
ولامريكان
ولا واكل ومالى بنوك
زى زمان
ولا ابليس
ولا شيطان
عايزين نحس يوم بأمان
نفسنا ننسى الهوان
نفسنا ننسى المذله
والامتهان
والانتخاب الِأِمتحان
يا تنجح والسعاده ليك تبان
يأما ترضى الامتهان
نفسنا تبقى السعاده
فى كل بيت وكل حاره
الدهب يفضل دهب
مهما شال من عفاره
والزفر يفضل زفر
مهما ينضف م الزفاره
والزباله بتبقى مسك
لو زباله من عِطّاره

والدهب يفضل دهب مهما شال من عفاره

شكرا على الابداع والامتاع000000000

» قواعد السعادة: كن مع الله، لا تحسد أحدا ولا تحقد، عش ببساطة مهما علا شأنك، توقع خيرا مهما كثر البلاء، تعلم العطاء بلا منّ ولا انتظار الرد!»
» مهما كنت مثاليا ستجد من يكرهك,,, حتى الملائكه تكرها الشياطين
» هل تتاسف عند الخطاا ام تاخذك العزه بالاثم ولاتعتذر مهما كان الجرم فى حق الغير
» كل الالوان تأتى من اللون الأبيض فـ احتفظ بـ الابيض فى قلبك مهما اشتدت الظلمة حولك .
» . أقول لكـــــــــــــــــــم . تعارفنا بالقلوب ولم نتعارف بالنظر .. تعارفنا بلا وجوه ولكن بالسطر .. قد لا تكونون على مد البصر .. وقد لا نلتقي مهما طال العمر .., لكن أسمائكم في طور الحفر .. على جبينى دوناً عن كل البشر .. فيا أحلى من عرفنا من وراء النقر ..